Wandugu,
Kuanzia wiki hii nitakuwa naweka hapa kwenye tovuti yangu mashairi ambayo nimekuwa nayaandika mara kwa mara.Nitakuwa nikiweka shairi angalau moja kwa wiki.Nikisahau ruksa kunikumbusha. Ukiniita mshairi sitakataa.Ila naomba ufahamu kwamba mashairi yangu hayana kanuni, naandika nitakavyo, kwa raha zangu,kero zangu,hasira zangu nk.Unaweza pia usinielewe naongelea nini.Hiyo itakuwa ni sehemu ya sanaa ya ushairi. Hili hapa chini nimeliita NIAZIMENI AKILI ZENU.

Udhia huu unatoka wapi na unatokana na nini?
Adhama hii itadumu mpaka lini,au ni ya muda mfupi tu?
Jana tumeadhimisha sikukuu gani au shujaa gani kazaliwa?
Au pengine amechipukia wapi,kaambiwa na nani ukweli?

Kengele ya adhuhuri imepigwa,waungwana waende kujisafi
Maadili yangali yanahitajika, ingawa naona kama yameshatuponyoka
Au yamekuwa adimu na bila maafikiano ya kiungwana
Lakini tusiahirishe mkakati wetu wa ukombozi, tusitende dhambi hiyo kamwe
Noeni visu na kuweka ala zenu mahali pake, hatujui mbeleni kunani

Ambatana na ufananao, lakini usikatae usiofanana nao pia
Tutakuita mbaguzi, tafadhali usikatae tukifanya hivyo
Anga limejaa harufu mbaya, pua zangu zinanusa damu zaidi
Najiapiza kwamba sitaki kuona vita, halafu najiona mbumbumbu
Vipi kama wenzangu wanataka vita, mimi ndio nibaki ndani?

Ardhi hii ni ya nani?
Au mpaka wale waketio Areopago waamua kunikabidhi?
Wanipe na kipande cha karatasi chenye jina langu?
Ishara hizi ni za nini ,wewe unaziamini?
Unataka na mimi niasi? Majuha si watanishangaa?
Nimechanganyikiwa kwa sababu napinga uzungu

Au nisimame madhabahuni kama askofu
Nipayuke kwa nguvu zangu zote
Kisha nisitende hata moja nisemalo, nipunge mkono niende zangu
Hivi hapo awali mambo yalikuwa ya aina gani?
Nataka kujua lakini sioni wa kumuuliza
Wengi wananitazama kwa jicho baya, wananiombea dua mbaya

Nimeazimia kukomboa wengi,nimeanza na kaya yangu kwanza
Naomba mnikopeshe akili kwenye vichwa vyenu nyote
Masikio siihitaji,yanaingiza na kutoa
Nataka kubatilisha kitendawili, hiki kigumu kuliko vyote.